லெகோ-வுக்கு ஐம்பது வயது
பல அதியற்புத கண்டுபிடிப்புகள் அமைப்பில் எளிமையானவை. இதற்கு முதன்மை உதாரணமாக நான் அடிக்கடிச் சொல்வது பேப்பர் கிளிப். ஒரு வெற்று கம்பியை எடுத்து சில முறை வளைத்துச் செய்யப்படுவது கிளிப். ஆனால் இன்றைய தினம் உலகெங்கிலும் பல லட்சக்கணக்கான அலுவலகங்களிலும், பள்ளிகளிலும், வீடுகளிலும் பயனில் இருக்கும் ஒரு சாதனம் கிளிப். இதைப் போல விளையாட்டு சாமான்களில் முதன்மை உதாரணமாக நான் கருதுவது லெகோ கட்டைகள். அமைப்பில் மிக எளிமையானது, ஆனால் உலகெங்கிலும் பல மில்லியன் சிறார்கள் (ஏன் பெரியவர்களும் கூடத்தான்) இதை வைத்துக்கொண்டு தினமும் விளையாடுகின்றார்கள். சில இடங்களில் இது மிக முக்கியமான விஷயங்களில் பயன்படுகிறது.
லெகோ 1958 ஆம் ஆண்டு ஒலே கிர்க் கிறிஸ்டியன்ஸன் என்ற டேனிஷ்காரரால் வடிவமைக்கப்பட்டது. மிகச் சாதாரணமான பிளாஸ்டிக் கட்டையும் அதன் மீது குமிழ்களையும் கொண்டது என்ற போதும் இதைக் கொண்டு சிக்கலான பல வடிவங்களைக் கட்டமுடியும். இங்கே நான் காட்டியிருப்பது லெகோவின் மிக அடிப்படையான எட்டுக் குமிழ் கட்டை. எத்தனை சாதாரணமானது! ஆனால் இப்படியான ஆறு எட்டுக்குமிழ் கட்டைகளைக் கொண்டு 900 மில்லியன் (துல்லியமாகச் சொல்ல வேண்டுமானால் 915,103,765) வெவ்வேறு அமைப்புகளை உருவாக்க முடியும். எனவேதான் லெகோ ஐம்பது ஆண்டுகளுக்குப் பின்னும் இப்பொழுதுகூட மிக முக்கியமான விளையாட்டுச் சாதனமாக இருக்கிறது. பார்பி, சூப்பர்மேன், போக்கேமான், தமகோட்சி, கேம்பாய், பிஸ், பிஸ்பி, எக்ஸ் பாக்ஸ் என்று எத்தனையோ விளையாட்டுச் சாதனங்கள் வந்து போய்விட்டன. இன்றளவும் நிலைத்திருப்பது லெகோ மட்டும்தான்.
லெகோ நிறுவனம் அதன் டேனிஷ் தொழிற்சாலையில் வருடத்திற்குப் 15 பில்லியன் பாகங்களை உற்பத்தி செய்கிறது. அதாவது மணிக்கு 1.7 மில்லியன் பாகங்கள். லெகோ உற்பத்தித் தரக்கட்டுப்பாட்டிற்கு மிகவும் பெயர்பெற்றது. அதனால் தயாரிக்கப்படும் 1 மில்லியன் பாகங்களில் சராசரியாக 18 மாத்திரமே பழுதானவையாக ஒதுக்க்ப்படுகின்றன. (யோசித்துப் பாருங்கள், சில பிளாஸ்டிக் கட்டைகளில் நூற்றுக்கணக்கான குமிழ்கள் இருக்கும் அவற்றில் ஒன்றின் அளவு குறைந்தாலோ, அல்லது குமிழ் முனையில் பிசிறு இருந்தாலோ ஒன்றுடன் ஒன்று சரியாகப் பொருந்தாது).
தனது சிறிய வண்டிகளுக்கான ரப்பர் டயர்களையும் லெகோ தானே தயாரிக்கிறது. வருடத்திற்கு 306 மில்லியன் டயர்களை உற்பத்தி செய்வதால் உலகின் மிகப்பெரும் டயர் உற்பத்தி நிறுவனம் கூட!
லெகோ பாகங்கள் எப்படித் தயாரிக்கப்படுகின்றன என்று இந்த படத்தொகுப்பு விளக்குகிறது.
* * *
என்னுடைய இரண்டு மகன்களுக்கும் லெகோவின் மீது அலாதிப் பிரியம். ஒரு வயதில் வாங்கிய லெகோ கட்டைகளைப் பதினோறு வயது ஆனபொழுதும் தொடந்து பயன்படுத்துகிறான் பெரியவன்.
இன்றைய விடியோ விளையாட்டு உலகில் லெகோ மெல்லச் சாகும் என்று சோசியம் சொல்லப்பட்டது. ஆனாலும் பிணைத்து உருவாக்கும் பல வீரப் பொம்மைகளை (Action Figures) அவ்வப்பொழுது வடிவமைப்பதன் மூலம் சந்தையில் நிலைத்து நின்று வருகிறது லெகோ. இப்பொழுது பிளாஸ்டிக் கட்டைகளை அடுக்குவதற்கு பதிலாக கணினித் திரையில் படக்கட்டைகளை அடுக்கி லெகோ உருவங்களை வடிக்கும் விடியோ விளையாட்டு கிடைக்கிறது.
சென்ற கிறிஸ்துமஸ்க்கு என் பையன்களுக்கு லெகோ மைண்ட்ஸ்றாம் வாங்கித்தருவதாக இருந்தேன். நிண்டெண்டு வீ, பிஸ்3, எக்ஸ் பாக்ஸ் எல்லாவற்றையும் விட விலை அதிகம் என்பதாலும், எல்லோரும் வீ பைத்தியத்தில் இருப்பதாலும் மைண்ட்ஸ்ராம் கிடைக்காமல் போய்விடாது என்று அசட்டையாக இருந்துவிட்டேன். ஆனால் கிஸ்துமஸ்க்குப் பத்து நாட்களுக்கு முன்னதாக டொராண்டோவில் ஒரு கடையிலும் இருப்பில் இல்லை. எனவே கடைசி நேரத்தில் இருப்பதிலெலேயா அதிக ஆளியக்கிக் கட்டுப்பாடுகளைக் (Manual control) கொண்ட Canon A570 IS வாங்கிக் கொடுத்தேன் (கிட்டத்தட்ட மைண்ட்ஸ்ராமைவிட கிட்டத்தட்ட 300 டாலர்கள் மலிவு). அடுத்த கிறிஸ்துமஸில் வரப்போகும் மைண்ட்ஸ்ராமுக்காக இப்பொழுது கொஞ்சம் Logo Programming கற்றுக் கொடுத்துவருகிறேன். லெகோ கனவு இன்னொரு வருடத்துக்கு ஊறப்போடப்பட்டிருக்கிறது.
If you enjoyed this post, please consider to leave a comment or subscribe to the feed and get future articles delivered to your feed reader.
Comments
Why is there no call to make lego bio-degradable? i can visualize tonnes of lego block garbage floating in the pacific 
வெங்கட்
லெகோ பைத்தியம் என் பையனுக்கு சில வருடங்களிலிருந்தது; முற்றிபோய் தற்போது முற்றிலும்
இல்லாமற் போய்விட்டது. வயதாகிவிட்டதாம் !
2003 ல் மகன் செய்த சில லெகோக்களை கம்பி அடுக்குத்தட்டுகளில் சேகரித்து வைத்துள்ளார் திருமதி;
அதிலிருந்து படங்கள்:
http://www.flickr.com/photos/vpillais3/2228213171/
http://www.flickr.com/photos/vpillais3/2228213181/
http://www.flickr.com/photos/vpillais3/2228213189/
http://www.flickr.com/photos/vpillais3/2228213193/
கேனடாவில் லெகோ நகரம் உள்ளதா…? இங்கே சேண்டியாகோவிற்கு அருகிலுள்ள Lego Land ற்கு
2003 ல் போனோம். மகர் (அசோகர் உங்கள் மகரா என்பதிலிருந்து… நன்றி: பாலையா) ரொம்பவே
அனுபவித்த விடுமுறையாய் அமைந்தது அந்த பயணம்.
பத்மா - பார்க்க எளிதாக இருந்தாலும் Post it-ல் இருக்கும் பசையின் தொழில்நுட்பம் எளிதானதில்லை.
ஆறு மாதக் குழந்தைகளுக்கு ஒன்றின் மீது ஒன்றை அடுக்கும் பயிற்சி அவர்களது மூளை வளர்ச்சிக்கு உதவுவதாகப் படித்திருக்கிறேன். கை-கண் ஒத்தியகத்திற்கும் அது மழலைகளுக்கு நல்ல பயிற்சி.
ஆனா ஒண்ணுங்க, ஆண் பிள்ளைகளைக் கவர்ந்த அளவு இவை பெண் பிள்ளைகளைக் கவர்வதில்லை. (ஆச்சு! நம்மாலானது!)
ஹேப்பி பர்த்டே லெகோ!
வாசன் - மகரின் (!) லெகோ வடிவங்கள் அருமை. இவற்றின் சில இங்கும் உண்டு.
லெகோ மைண்ட்ஸ்றாம் எத்தனை வயதானாலும் அலுக்காது என்றுதான் தோன்றுகிறது.
கொத்ஸ் - வம்புல இஸ்துவுட்றதுக்குன்னே பொறப்பட்டுகீறீகளா?
நன்றி.. இது பற்றிய விசயங்கள் இப்பொழுது தான் அறிந்து கொண்டேன், இதற்கு லெகோ என்கிற பெயர் என்பது இப்பொழுது தான் தெரியும்.
கிளிப் பற்றி நீங்கள் ஏற்கெனவே எழுதியிருக்கிறீர்களா? இது பற்றி யாரோ சொன்ன/படித்த ஞாபகம்.
சில விளையாட்டுப்பொருட்களில் மூன்று வயதுக்கு மேற்பட்டவர்கள் தான் பயன்படுத்தவேண்டும் என்று எழுதப்பட்டிருக்கும். அது லெகோவிலுமா? காந்தம் போன்றவை பயன்படுத்துவதால் என்று நினைக்கிறேன்.
மாஹிர் - நன்றி! கிளிப் பற்றி எழுதியிருக்கிறேன் என்று நினைக்கிறேன். வலைப்பதிவில் தேடினால் கிடைக்கும். (இல்லாவிட்டால் விரிவாக எழுதலாம், எனக்குப் பிடித்த விஷயம்).
லெகோவில் காந்தம் கிடையாது. வெறும் பிளாஸ்டிக் கட்டைதான். குமிழ் மீது அடுத்த கட்டையின் அடிப்பாகத்தைப் பொருத்தினால் சேரும்.
ஆறுமாதக் குழந்தைகளுக்கான லெகோ கட்டைகள் இருக்கின்றன. சிறியவர்களுக்கானவை அளவில் பெரிதாக இருக்கும். இதைக் கொடுத்துப் பழக்குவது கையில் பிடிமானத்தை விரைவாக வளர்க்க உதவுவதுடன். கண்-கை ஒத்தியகத்தை (Hand to Eye coordination) மேம்படுத்தவும் உதவும்.
ஆனா இதில் ஏன் சாதுவான வடிவங்கள் குறைவா இருக்கு? கடைல பார்த்தா star wars, indiana jonesனு எல்லாமே ஏதோ வன்முறை themeஆவே இருக்கே! கொஞ்சம் சாதுவா, வீடு, வாசல்னு இருந்தா வாங்கி செஞ்சு பார்க்கலாம்னா முடியலையே!
பூர்ணா - வெறும் கட்டைகள் (படத்தில் காட்டியிருப்பதைப் போல) வாங்குங்கள். அதை வைத்துக்கொண்டு பல அற்புதமான வடிவங்களைக் கட்டமுடியும்.
என்னுடைய பையன் நான்கு வயது இருக்கும் பொழுது இந்த வெறும் கட்டைகளை வைத்துக்கொண்டு ஒரு காமெரா வடிவத்தை அற்புதமாகச் செய்தான், அதில் ஒரு கட்டையை அழுத்தினால் ப்ளாஷ் (என்று சொல்லப்பட்ட) கட்டை மேலே எழும்பும்.
வீடு, கோபுரம், பாலம் இப்படி எல்லாமே சாத்தியம்.
லெகொ குழந்தைகளுக்கான விளையாட்டு மட்டுமில்லை. நம்முடைய கற்பனை சக்தியை அதிகரிக்கவும், மனத்தை அமைதிப்படுத்தவும் கூட பயனாகிறது. சில மனநல மருத்துவமனைகளில் பயன்படுத்தப்படுகிறது.
லெகோவில் ரோபாட் செய்வது போன்ற ஒன்றை வாங்கினோம்(2007 Mindstorm not as complicated as the new ones). அதிலேயே தானியங்கி காமிராவும் உண்டு. செய்து முடிக்க 4 பேருக்கு கிட்டதட்ட அரைநாள் ஆகி இருந்தது. இங்கே சில பள்ளிகளில் கோடைவிடுமுறைகளில் லெகொரோபாட்டிக்ஸ் பயிற்சி வகுப்புகளும் உண்டு.
எளிய கண்டுபிடிப்புகளில் என்னை கவர்ந்த ஒன்று post it.