ramanujan.jpg

ஏதோ ஒன்றுக்காகத் தேடிக்கொண்டிருந்தபொழுது இந்த தவறவிட்ட பிபிஸி செய்தி கண்ணில்பட்டது.

கணிதமேதை ராமானுஜனின் வரலாற்றைத் திரைப்படமாக்க முயற்சிகள் மேற்கொள்ளப்பட்டு வருகின்றன.  பிரிட்டிஷ் இயக்குநர் ஸ்டீஃபன் ஃப்ரையும்  இந்தியர் தேவ் பெனகல்-ம் சேர்ந்து இந்த முயற்சியை மேற்கொள்கிறார்கள்.   இது மிகத் துவக்க நிலையில் இருப்பதாகத் தெரிகிறது.

சென்ற வருடம் The Indian Clerk  என்ற தலைப்பில் புனைவாக்கம் செய்யப்பட்ட ராமானுஜனின் வரலாறு புத்தகமாக வெளிவரவிருந்து இதுவரை வந்ததாகத் தெரியவில்லை.   நியூயார்க் க்வீன்ஸ் பல்கலைக்கழகத்தின் நாடகத்துறை பேரா. இரா ஹாப்ட்மன் ராமானுஜனுக்கும் ஹார்டிக்கும் இடையில் இருந்த நட்பையும் முரண்பாடுகளையும் முன்வைத்து 2003ல்  Partition என்ற மிகப் பொருத்தமான தலைப்பில் நாடகம் ஒன்றை இயக்கினார்.   பலத்த வரவேற்பு பெற்ற இந்த நாடகத்தை நண்பர் தூள் பாலாஜி தமிழில் மொழியாக்கம் செய்து இயக்கினார். இந்த நாடகம் சான்பிரான்ஸிஸ்கோ தமிழ் மன்றத்தில் அரங்கேற்றப்பட்டது.   தமிழ் நாட்கம் பற்றிய தளம் இங்கே.

இதற்கு உயரமும் வெளுப்புமான சல்மான்/அமீர்/ஷாருக்/அஜய் தேவ் இத்யாதி கான்களை விடுத்து ஒரு அக்மார்க் தென்னிந்த கருப்பர் கதாநாயகனாகத் தேவைப்படுவார்.   எனக்குத் தெரிந்தவரையில் இப்பொழுது நம்மூரில் எந்த நடிகரும் இந்தப் பாத்திரத்தைச் செய்ய பொருந்தமாட்டார்கள்.  யாராவது புதுமுகம்தான் வேண்டும்.   இல்லை, உங்களில் யாருக்காவது ராமானுஜனின் பாத்திரத்திற்கு இந்த நடிகர் பொருந்துவார் என்று தோன்றுகிறதா? எழுதுங்கள்.

பின்னணி இசைக்கு முழுமனதுடன் இளையராஜாவைப் பரிந்துரைப்பேன்.