மங்களாம்பா விலாஸில் திருடியது
by வெங்கட் • December 9, 2005 • நகைச்சுவை • 5 Comments
எங்கள் ஊரில் (கும்பகோணம்) மங்களாம்பா விலாஸ் என்ற பிரபலமான ஹோட்டல் ஒன்று இருந்தது. அங்கிருந்த பாத்திரங்களிலெல்லாம் “மங்களாம்பா விலாஸில் திருடியது” என்று பொறித்து வைத்திருப்பார்கள். டம்பளர் டபராவில் ஆரம்பித்து (அந்த நாட்களில் ஸ்பூனை வாயில் நுழைத்துக்கொண்டு சாப்பிடும் வழக்கமெல்லாம் கிடையாது, எனவே மிகச் சிறிய பாத்திரம் டம்ளர்தான்), அண்டா, இட்லிச்சட்டி வரை எல்லாவற்றிலும் அப்படி எழுதியிருக்கும். சாப்பிட வந்தவர்கள் நல்ல கனமான பித்தளையில் இருக்கும் பாத்திரங்களை ‘லவுட்டி’ வேட்டியில் கட்டிக்கொண்டு போய்விடுவார்கள் என்று கேள்விப்பட்டிருக்கிறேன்.
இப்பொழுது அதிநவீன கணினி உலகிலும் இப்படி இருப்பதை இன்றைக்குத் தெரிந்துகொண்டேன். ஆப்பிள் நிறுவனத்தின் அழகிய குறும்படங்களை ஒரு நிறுவனம் திருடி விற்கப் போக பின்னர் அவர்களின் தயாரிப்பில் இரகசியமாக “Stolen from Apple” என்று உள்ளே ஒரு சங்கேததைப் பதிந்ததார்கள் என்று இந்த செய்தி சொல்கிறது.
இதைப் படித்தவுடன் இன்னும் சில விஷயங்கள் நினைவுக்கு வந்தன. கும்பகோணம் திரையரங்குகளில் ஒரு தகர ட்ரம்மில் தண்ணீர் வைத்திருப்பார்கள் (இன்னும் அப்படித்தானா என்று தெரியவில்லை) அத்துடன் ஒன்றிரண்டு அலுமினியத் தம்ளர்களையும் வைப்பார்கள். அந்த நசுங்கிப் போன அலுமினியத் தம்ளர்களை ஒரு இரும்புச் சங்கிலியுடன் இணைத்திருப்பார்கள். தம்ளரின் விலை அன்றைய நடப்பில் ஒரு சினிமா டிக்கட்டின் மதிப்புகூட பெறாது. அதை டம்ளரின் விலையைக் காட்டிலும் ஐந்து மடங்கு நீளமுள்ள நாய்ச் சங்கிலியின் பிணைத்திருப்பது வேடிக்கையாக இருக்கும். ஒருவர் குடித்துக் கொண்டிருக்கும்பொழுதே அவசரமாக இன்னொருவர் சங்கிலியை இழுக்க நீர் சட்டையில்தான் கொட்டும் வாயில் போகாது. ஒரே ஆள் இரண்டாம் முறை தண்ணீர் எடுத்தால் அடிக்க வருவார்கள். இந்த சோகத்தில் பல முறை நான் ஒரு சொட்டு தண்ணீர்கூட கிடைக்காமல் வந்திருக்கிறேன்.
இதுபோன்ற சங்கிலி பிணைப்பு சமாச்சாரம் எதாவது ஆப்பிளில் உண்டா என்று பார்க்க வேண்டும். இல்லாவிட்டால் இதை ஸ்டீவ் ஜாப்ஸ் காதில் போட்டு வைத்தால் அடுத்த முறை உள்ளங்கை அளவு ஐபாட்-நானோவிற்கு ஏதாவது சங்கிலி விற்கக்கூடும்.
* * *
அது கிடக்க; மங்களாம்பா விலாஸ் நொடித்துப் போனது. பின்னர் Acquisition and Merger முறையில் கற்பக விலாஸ் செட்டியார் இதையும் வளைத்துப் போட்டார். மங்களாம்பா மாமா Asset Transfer செய்யும் முன்னர் ஒரு பத்து டம்ளரை வீட்டில் கொண்டு வந்து போட்டார். பெண் பார்க்க வந்தவர்களுக்கு அதில் காப்பிக் கொடுக்கப் போக அவர் பெண்ணுக்கு கல்யாணம் தடைப்பட்டது என்று கும்பகோணத்தில் வதந்தி உலவும்.
நாளை ஒருநாள் இதேபோல கஷ்டம் வந்து ஆப்பிள் நிறுவனமும் திண்டாடுமோ?
>>நாளை ஒருநாள் இதேபோல கஷ்டம் வந்து ஆப்பிள் நிறுவனமும் திண்டாடுமோ?
ஓய், checked out apple stock price recently?…மனதுக்கினிய மனிதர் தலைமையில், மனதுக்கினிய பொருட்களைச் செய்யும், மனதுக்கினிய நிறுவனத்தைப் பற்றி கெட்ட ஹேஷ்யம் சொல்லாதீர்!
கதை நன்றாக இருந்தது. நம்ம ஊர் மேட்டர் ஒன்று…
கன்றுக்குட்டியில் இருந்து ஆசையாக வீட்டுத் தொழுவத்தில் மாடு வளர்ந்து வந்தது. திடீர்னு ஒரு நாள் காணாமப் போச்சு. கழுதை கெட்டா குட்டிச்சுவர் என்று ஊரெங்கும் தேடியும் கிடைக்கலை.
சந்தைக்குப் போய் புதுசு வாங்க கிளம்பினான். அங்க பார்த்தா இவனுடைய மாட்டுக்கு எவனோ ஒருத்தன் துண்டு போட்டு விலை சொல்றத பார்க்கறான். நேரா போய் உருமலுடன் உரிமை கோருகிறான்.
சண்டைய விலக்க குசும்பன் (இணையக் குசும்பன் அல்ல) வராரு.
'ஒதுங்குங்கப்பா' என்று ரெண்டு பேரையும் தள்ள சொல்லிட்டு மாட்டோட கண்ணு ரெண்டையும் பொத்திண்டு, திருடனிடம் 'எந்தக் கண்ணில் பூ விழுந்திருக்கு'ன்னு சொல்லச் சொல்றான்.
'இடது கண்' என்கிறான். கண்ணு ரெண்டும் ஜோரா தெரிகிறதைப் பார்த்த ஊர் மக்கள் கள்வனைக் கண்டு கொள்கிறார்கள்.
இதெல்லாம் சரி… ப்ளாக்பெர்ரிக்கும் எண்டிபி-க்கும் என்ன தகராறு!? யாரு அசல்/யாரு நகல்?
அட நீங்களும் நம்ம ஊரு தானா ?
நான் படித்ததெல்லாம் டவுன் ஹைஸ்கூல்ல தானுங்கோ. நமக்கு சொந்த ஊரு சுவாமிமலை.
தொடர்ந்து எழுதுங்கள்.
சதீஷ்
[3] இந்த நாய் செயின் விவகாரம் சினிமா தியேட்டர்களில் மட்டுமில்லை. புகைவண்டி நிலையம், மற்றும் எல்லா இடத்திலும் உள்ளது.
=இஸ்மாயில் கனி
கனமான பித்தளை டபரா செட் இப்போது எங்கே? கனம் குறைந்த, காற்றில் பறக்கும் அளவிற்கு ஸ்டெயின்லஸ் ஸ்டீல் செட் தான்.
=இஸ்மாயில் கனி
(கும்பகோணத்தான்)
http://kaniraja.blogspot.com