டிஸ்கவரி விண்ணோடத்தின் கடந்த பயண முடிவில் தன்னுடைய விண்ணோட முயற்சிகளைக் காலவரையறையின்றி ஒத்திப் போடுவதாக அறிவித்திருந்த நாஸா நேற்று தன்னுடைய வருங்காலத் திட்டங்களை அறிவித்திருக்கிறது. அடுத்த பத்து வருடங்களுக்குள் முற்றிலும் புதிதாக வடிவமைக்கப்பட்ட ஏவுகலங்கள் மூலம் தன்னுடைய விண்ணாய்வாளர்களை நிலவில் இறக்கி ஆராய்ச்சிகள் நடத்துவது என்றும் அதைத் தொடர்ந்து 2018 ஆம் ஆண்டு வாக்கில் மனிதர்களை செவ்வாய்க் கிரகத்திற்கு அனுப்புவது என்றும் திட்டம் தீட்டியிருக்கிறார்கள்.

மிக விரிவாக முன்வைக்கப்பட்டிருக்கும் இந்தத் திட்டங்களில் சில நல்ல விஷயங்கள் இருக்கின்றன. சில கேள்விக்குரியவையாக இருக்கிறன. பொதுவில் நுட்பம் சம்பந்தப்பட்ட தகவல்கள் நல்லனவாகவும் திட்டமிடல், பொருளாதாரம் குறித்தவை கேள்விக்குரியவையாகவும் இருக்கின்றன. புதிதாக வடிவமைக்கப்படும் கனந்தூக்கி ஏவு முறை (Heavy-lift Launching) என்பது புதுமையானதும், முன்னோக்கிய சிந்தனையாகவும் இருக்கிறது. கூடவே இதில் மீத்தேன் அடிப்படியிலான எரிபொருள்கள் பயன்படுத்துவதும் நல்ல முயற்சி (இது நீண்ட எதிர்காலத்தை மனதில் கொண்டது என்று நாஸா சொல்கிறது; செவ்வாயின் மண்டலத்தில் மீத்தேன் நிறைய இருப்பதால் இதை எரிபொருளாகப் பயன்படுத்துவது சிக்கனமானதாக இருக்கும்). அப்போலோ முயற்சிகளின் மீது கட்டப்படும் இந்த புதிய ராக்கெட்டுகள் அதைவிட மிகக் கனமானதாகவும், அதிக ஆய்வாளர்களைத் தாங்கிச் செல்வனவாகவும் இருக்கும்.

மறுபுறத்தில் நீண்ட திட்டம் என்பது கேள்விக்குறியதாக இருக்கிறது. அடுத்த பத்தாண்டுகளுக்குள் இரண்டு ஜனாதிபதிகள் அமெரிக்காவில் வந்து போவார்கள். அவர்கள் இருவரும் இந்தத் திட்டத்தை முழுமனதுடன் ஆதரிக்காவிடில் இது மறைந்து போகும். கூடவே $104 பில்லியன் என்பது மிகப் பெரிய தொகை. அமெரிக்காவின் பொருளாதாரம் இப்பொழுது அவ்வளவு உன்னதமான நிலையில் இல்லை. சமீபத்திய குடியரசுக்கட்சி ஆட்சியில் வரிகளைத் தவிர்த்து வருகிறார்கள். கூடவே 9/11, கத்ரினா, இவான் என்று திட்டமிடாத செலவினங்களும் அதிகமாக இருக்கின்றன. இந்த நிலையில் 105 பில்லியன் என்பது வெறும் கனவாக முடியும் அபாயம் நிறையவே இருக்கிறது. கூடவே, சமீப காலங்களில் அமெரிக்காவில் விண்ணாராய்ச்சிக்குப் பொதுமக்கள் ஆதரவு குறைந்து வருகிறது. இந்த நிலையில் திட்டமிடலுக்கு மக்களிடமிருந்து அவ்வளவாக வரவேற்பு இருக்காது என்று தோன்றுகிறது (வருத்தத்திற்குரிய விடயம்). கூடவே பனிப்போர் காலங்களில் இந்த விண்ணாராய்ச்சிக்கு இலக்கு, உத்வேகம் என்று இருந்தன. கென்னடியின் கனவுகள் அமெரிக்கர்களை உசுப்பிவிட்டன. இப்பொழுது அவையெல்லாம் இல்லாத நிலையில் மக்கள் இதைக் கேட்டுத் துள்ளிக் குதிக்கப்போவதில்லை.

இவையெல்லாம் கட்டாயம் நடக்க வேண்டும். இன்றைய நிலையில் இதுபோன்ற கனவுத்திட்டங்களுக்கு நாஸாவைத் தவிர வேறு யாராலும் முடியாது. ஆனால் முகத்தில் அறையும் உண்மை இது காணல் நீராகப் போய்விடுமோ என்று அச்சத்தைத் தருகிறது.

பின் குறிப்பு: நாஸாவின் தளத்திற்குப் போய் அங்கே அவர்கள் திட்டமிட்டு உருவாக்கியிருக்கும் சலனப்படங்களைக் கட்டாயம் பார்க்க உங்களுக்குப் பரிந்துரைக்கிறேன்.