நீண்ட நெடும்பயணத்தின் பின் பெங்களூர் வந்து கிட்டத்தட்ட மூன்று நாட்களாகப் போகின்றன. முன்னெப்போதும் இல்லாதவகையில் மிக மோசமான பயணக்களைப்பு தொடர்ந்துகொண்டிருக்கிறது. வேறெந்த பயண சாத்தியமும் இல்லாமற்போக பயந்துகொண்டே ரஷ்யாவின் ஏரோஃப்ளோட் விமானத்தில் வந்தாக வேண்டியிருந்தது. வாழ்க்கையின் மிக மோசமான விமானப் பயணம் இது (கிட்டத்தட்ட பிஹாரில் முன்பு ஒருமுறை மேற்கொண்ட இரயில் பயணத்தைப் போலவே). இதில் சில அற்புத நகைச்சுவை தருணங்களும் அடக்கம். மாஸ்கோ விமான நிலையம், ஏரோஃப்ளோட் விமானம் இவற்றையெல்லாம் பற்றி விரிவாக ஊர் திரும்பிதான் எழுதவேண்டும். முதலாவதாக ஐந்துவருட இடைவெளிக்குப் பின் பெங்களூரில் என்னுடைய முதல் எண்ணங்கள்; (இவற்றில் பல ஊர் வரும் வெளிநாட்டு வாசியின் கேணத்தனமான புலம்பல்களாக இருந்தாலும் உண்மையில் மனதுக்குத் தோன்றியதைப் நேர்மையாகப் பகிர்ந்துகொள்கிறேன்).

1. மிகச் சோகமான நிகழ்வு நான்வந்து சேர்ந்த சில மணிகளுக்குள்ளாக இந்திய அறிவியல் கழக வளாகத்தில் நடந்தேறியிருக்கும் தீவிரவாத வன்முறை. ஐஐஎஸ்ஸி-க்கு வரும் திங்கள்/செவ்வாய் செல்லும்பொழுது நண்பர்கள் மூலமாக சில நேரடித்தகவல்கள் கிடைக்கலாம். பேராசிரியர் பூரி குடும்பத்தின் இழப்பு மிக அதிகம். மத்திய, தில்லி மாநில அரசுகள் போதுமான வகையில் அவர் குடும்பத்திற்கு அனுதாபங்களைத் தெரிவிக்கவில்லை. துப்பாக்கிச் சூட்டில் பாதிக்கப்பட்ட விஜய் சந்துரு-வை ஓரளவுக்குத் தெரியும் (இவர் சிம்ப்யூட்டர் கைக்கணினி வடிவமைப்பில் முக்கியப் பங்காற்றியவர்). விஜய் பிழைத்துக்கொண்டது குறித்து நிம்மதி.

2. சென்றமுறை பார்த்ததில் இந்த முறை காணாமல் போயிருப்பது: சாலைகள். அந்த இடத்தில் சில கற்களும் நிறைய குழிகளும் இருக்கின்றன. பெங்களூரில் வாகனங்கள் அளவிடமுடியாத வகையில் அதிகரித்திருக்கின்றன.

3. எங்கும் தூசிப் படலமாக இருக்கிறது. வந்து சேர்ந்து மூன்று நாட்களாக என் மனைவி தும்மிக்கொண்டே இருக்கிறார். அவருக்கும் எனக்கும் கண்கள் சிவந்தே இருக்கின்றன (தூசியினால் வரும் ஒவ்வாமை). மரங்களின் இலைகள் தூசிபடிந்து பெங்களூரே பழுப்பு நிறத்தில் இருப்பதைப் போலத் தோன்றுகிறது.

4. ஒரே ஒருமுறை எம்.ஜி. ரோட், கமர்ஷியல் ஸ்ட்ரீட் (இவற்றுக்கெல்லாம் கன்னடத்தில் எந்தப் பெயரும் கிடையாது) சென்றிருந்தேன். Bangalore seems to be in a great shopping orgy. ஒவ்வொரு கடையில் அநியாயத்திற்குக் கூட்டம். விலையைப் பற்றிச் சொல்லத் தேவையில்லை. ஐந்து வருடத்திற்கு முன்னால் முன்னூறு முதல் ஐநூறு வரை கொடுத்த சுடிதார்கள் ஆயிரத்து ஐநூறு ஆகியிருக்கின்றன என்று மனைவி சொல்கிறாள். ஒரு காலத்தில் இலகுவான நடைபயின்று கடைகடையாக ஏறி இறங்கிய கமர்ஷியல் ஸ்ட்ரீட் தெரு இப்பொழுது மதுரை அழகர்கோவில் திருவிழாவின் பரபரப்புக்கு மாறியிருக்கிறது.

5. கஷ்டப்பட்டு கடைகடையாய் அலைந்து நண்பர்களின் விருப்பங்களை மனதில் கொண்டு தேடித்தேடி வாங்கிய Lindt, Tablerone, FR, ஸ்விஸ் சாக்லேட்கள் நில்கிரீஸ் சூப்பர் மார்க்கேட்டில் கொட்டிக்கிடக்கிறன; கிட்டத்தட்ட அதே விலை. இதைத் தவிர Rado, Tag Hauer, Citizen கடிகாரங்களில் துவங்கி, L’Oreal, Armani, Gucci என்று அழகுப் பொருட்கள் ஈறாக, Jockey Underwear வரை வெளிநாட்டு சாமான்கள் இறைந்து கிடக்கும் கடைகளில் புடவை கட்டிய தாயார்கள் பெண்களை ஷாப்பிங் செய்ய விட்டுவிட்டு பின்னால் பொறுமையாக நின்று கொண்டிருக்கிறார்கள். காசு கொட்டிக் கொடுத்து வாங்கிய வெளிநாட்டு உள்ளாடையைப் பிறருக்குக் காட்டியாக வேண்டிய கட்டாயத்தில் அந்தப் பெண்கள்.

6. பெண்களின் உடைகளில் கை காணமல் போயிருக்கிறது. டி-ஷர்ட்டும் சுரிதாரும் – செயலிழந்தால் தேவையில்லாமப் போகும் பரிணாமக் கோட்பாடுகளுக்கு ஏற்றபடி – கைகளில்லாமல் ஆகியிருக்கின்றன. மூன்று வரிசைகள் கொண்ட சல்வார் கடைகளில் 75%-த்தில் கை கிடையாது என்பதால் என் மனைவியின் தெரிவுக்கு சாத்தியமில்லாமல் ஷாப்பிங் அதிவிரைவாக முடிந்தது.

7. பிரிகேட் ரோட் ரங்கநாதன் தெருவைவிட அதிக நெருக்கடி கொண்டதாக இருக்கிறது. (வித்தியாசம் – பெங்களூர் என்பதால் இதை வாகனங்களைத் தடைசெய்து நடைத் தெருவாக மாற்றுவது சாத்தியமில்லை). ஆட்டோக்கள் தடை செய்யப்பட்டிருந்தாலும் கார்கள் தோள்களை உரசிக் கொண்டு செல்கின்றன.

8. வீட்டின் எதிரில் புழுதி பறக்கும் தெருவில் புதிதாக பன்றி இறைச்சிக்கடை வந்திருக்கிறது. அங்கே வாங்கிச் சாப்பிடுபவர்களின் சுகாதாரத்தைப் பற்றி விசனப்பட வேண்டிருக்கிறது.

9. உலகத்திலேயே மிகத் துரிதமான, எளிதான அந்நியச் செலாவணி மாற்றுச் சேவை மும்பை விமான நிலையங்களில்தான் இருக்கின்றது. முகத்தில் நிறைய பயணக்களைப்பும் உடையில் எங்காவது அந்நியத்தன்மையும் தென்பட்டால் காலை, இடுப்பை, பிறகு கழுத்தைப் பிடித்து டாலர் மாற்றச்சொல்லி வற்புறுத்திக் கொஞ்சிக் கெஞ்சுகிறார்கள். ஒரு காலத்தில் என் மாமாவின் வங்கி இரும்புப் பெட்டியில் மாத்திரமே பார்த்ததைவிட அதிகப் பணம் அவர்கள்இடதுகையில் திமிறுகிறது.

10, ஒற்றைக் கைப்பையை எடுத்துக் கொண்டு ஓடிவந்து டிக்கெட் வாங்கிக் கொண்டு விமானம் ஏறி பயணிக்கும் புதிய ஜாதி உருவாகியிருக்கிறது.

முதலில் பகலில் தூங்கி இரவில் விழித்துக்கொள்வது நின்றால் தேவலாம் போலிருக்கிறது. கண்களைக் கசக்கிக் கொண்டு பெங்களூரை நன்றாகப் பார்க்க வேண்டும்.