<%image(20050728-phal.jpg|512|384|phal)%>

நேற்று வீட்டில் பூத்திருந்த ஆர்க்கிட் ஒன்றைப் படமெடுத்துக் கொண்டிருந்தேன். இந்தியாவில் குறிப்பாக மேற்குத் தொடர்ச்சி மலைகள், இமய மலைத் தொடர் போன்றவற்றிற்கே விசேடமான அழகான ஆர்க்கிட்கள் பல உண்டு. மேலே இருக்கும் படத்தில் உள்ள பெலனோப்ஸிஸ் வகை ஆர்க்கிட் இந்தியாவைப் பூர்வீகமாகக் கொண்டவை. இவற்றைத் தவிர டென்ட்ரூபியம், சிம்பிடியம் வகை ஆர்க்கிட்களும் இந்தியாவைப் பூர்வீகமாகக் கொண்டவை. மேலை நாடுகளிலும், ஜப்பான், ஆஸ்திரேலியா சீனா நாடுகளில் ஆர்கிட்களுக்கு நிறைய மதிப்பிருக்கிறது. இந்தியாவில் இவற்றைப் பற்றி பெரிதும் யாரும் கண்டுகொள்வதில்லை.

ஆர்கிட்களைப் போன்ற அழகான பூக்களைப் பற்றி தமிழ் இலக்கியத்தில் வருகிறதா என்று சிந்தித்துப் பார்த்தேன். எனக்குத் தெரிந்த வகையில் செவ்விலக்கியத்தில் பாடல்கள் எல்லாவற்றிலும் மலர்கள் குறிப்பிடப்படும்பொழுது அவற்றின் நறுமணத்திற்காகவே குறிப்பிடப்படுகின்றன. சிலவற்றில் மலர்களில் தாது உண்ணும் வண்டுகளைப் பற்றி. பூக்களின் வடிவ அழகு பற்றி தமிழ் இலக்கியங்களில் என்னென்ன பாடல்கள் இருக்கின்றன என்று யாராவது சொன்னால் நன்றியுடையவனாக இருப்பேன்.

நம்மூரிலேயே பொதுவாக பூக்களை அழகுக்காகவன்றி நறுமணத்திற்காகவே அதிகம் போற்றுவதாகத் தோன்றுகிறது. இது மற்ற கலாச்சாரங்களிலிருந்து முற்றிலும் மாறுபட்டிருக்கிறது.