இன்று தமிழ்நாடு அரசின் பள்ளிக் கல்வி இயக்குநரகத்தின் இணையதளத்தைப் பார்க்க நேரிட்டது. சந்தோஷமாக இருக்கிறது.

தமிழகப் பள்ளிகளின் பாடத்திட்டத்தை இணையத்தில் வெளியிட்டிருக்கிறார்கள். ஆறாம் வகுப்பிலிருந்து +2 வகுப்புவரை எல்லா பாடங்களுக்குமான திட்டகள் முழு வடிவில் கிடைக்கின்றன. வகுப்பைத் தெரிவு செய்து, பாடத்தைத் தெரிவு செய்து பயிற்று மொழியை (தமிழ்/ஆங்கிலம்) தெரிவு செய்ய பாடத்திட்டம் பிடிஎ·à®ªà¯ கோப்பாகக் கிடைக்கிறது. மிகவும் தெளிவாக வடிவமைக்கப்பட்ட இணைய தளம். தேவையற்ற படங்கள் இல்லை, அனாவசிய உபரி தகவல்கள் அள்ளித் தெளிக்கப்படவில்லை. இதை இப்படித்தான் செய்யவேண்டும் என்ற வகையில் உதாரணம் காட்டலாம். என்னுடைய பாராட்டுக்கள் (இதை நேரடியாக பள்ளிக் கல்வி இயக்குநர் திரு மாரியப்பன் அவர்களுக்கும் எழுதியிருக்கிறேன்).

12 ஆம் வகுப்பின் கணித, இயற்பியல் பாட வரைவுகளைப் அணுகிப் பார்த்தேன். நான் படித்து பதினைந்து வருடங்களுக்கு மேலாகிவிட்டது. இருந்தபொழுதும் கணிதத்தில் புதிதாக பெரிய அளவில் எதுவும் வரவில்லை என்பதைக் காண்பதற்கு ஏமாற்றமாக இருக்கிறது. எனக்கு நினைவிருக்கும் வகையில் தர்க்க கணிதம் (Mathematical Logic) என்றொரு பிரிவை அறிமுகப்படுத்தினார்கள். பின்னர் அது மாணவர்களுக்கு அதிகம் என்று சொல்லி நீக்கிவிட்டார்கள். ஆவலாக அதைத் தேடிப்பார்த்தேன், காணவில்லை. (ஒருக்கால் பதினோறாம், பத்தாம் வகுப்பில் இருக்கிறதா என்று தெரியவில்லை). எனக்குத் தெரிந்தவகையில் பெரிய மாற்றம் அறிவியல் பயிலும் மாணவர்களுக்கும், வணிகம் பயில்பவர்களுக்குமாகத் தனித்தனியாக இரண்டு பாடத்திட்டங்கள் இருப்பது. நல்ல உத்தி. (நான் படிக்கும்பொழுது வணிகம் படிக்கும் மாணவர்கள் வகைகெழு சமன்பாடுகள் (Differnetial Equations) பகுதியில் வரும் இயற்பியல் கொஞ்சமும் தெரியாமல் அதைப் புரிந்து கொள்ளச் சிரமப்பட்டது நினைவிருக்கிறது). ஆனால் கணிதப் பாடத்திட்டத்தில் மிகவும் அதிகமாக எதிர்பார்த்த எனக்கு ஏமாற்றமாகத்தான் இருக்கிறது.

மாறாக இயற்பியல் பாடத்திட்டம் ஓரளவிற்கு நிறைவைத் தருகிறது. அந்த வகுப்பில் நான் படிக்காத பல விஷயங்கள், (உதாரணமாக மீக்கடத்திகள், லேசர்கள் என்று பாடங்களிலும், NPN ட்ரான்ஸிஸ்டர்களின் குணங்களை அளத்தல் என்று செய்முறை வகுப்புகளிலும் குறிப்பிடத்தக்க மாற்றங்கள் இருக்கின்றன). இன்னும் ஆழமாகப் பார்க்கவேண்டும். பொதுவில் மூன்று-ஐந்து வருடங்களுக்கு ஒருமுறை பாடத்திட்டத்தின் பத்து சதவீதம் அதன் முந்தைய வகுப்பிற்குத்தள்ளப்பட்டு புதிய விஷயங்கள் சேர்க்கப்பட வேண்டும். இது அறிவியல் பாடங்களுக்கு மிகவும் அவசியம்.

தமிழ்ப் பாடத்திட்டத்தைப் பார்க்க பெரிய மாற்றம் இருப்பதைப் போலத்தான் தோன்றுகிறது (வஞ்சிப்பாவின் இலக்கணம் கூறு, முக்கூடற்பள்ளு பாடலை அடிபிறழாமல் எழுது இன்னும் உத்தரவாதமாக பதினைந்து மதிப்பெண்களை அள்ளித்தர முடியும்). குழு விவாதங்கள், வானொலி கேட்டல், கேட்கும்பொழுதே இலக்கணப் பிழைகளை அடையாளம் காணல் என்ற ரீதியில் பாடத்திட்டம் விவரிக்கப்பட்டுள்ளது. இது எந்த அளவில் நடைமுறைப்படுத்தப்படுகிறது என்பது தெரியவில்லை (ஏப்பிரல் மாதம் முழுப்பரிட்சை சமயத்தில் மதியம் உழவர் உலகம் ஒலிபரப்பப்பட்டு குடுமியான்மலை நெல் ஆராய்ச்சிக்கூடத்தில் வெளிவந்திருக்கும் சிந்தனைச் செல்வி என்ற புதிய அரிசியைத் தீவிர சாகுபடி செய்ய விவசாயிகளை வற்புறுத்தும் பொழுது மாணவர்கள் பேப்பர்-பென்சிலை வைத்துக் கொண்டு பேச்சில் ஆறாம் வேற்றுமை உருபும் பயனும் உடன்தொக்கத் தொகை வந்திருக்கிறதா என்று பரிட்சையில் எழுதுவார்கள் என்று எனக்கு நம்பிக்கையில்லை).

* * *
மிகவும் பாரட்டத்தக்க முயற்சி.

இப்படி பாரதிதாசன் பல்கலைக்கழகத்திலும் பாடத்திட்டத்தை வெளியிட்டால் நான் படித்த பி.எஸ்.ஸி, எம்.எஸ்.ஸி பாடங்கள் எந்த அளவிற்கு மாற்றியமைக்கப்பட்டிருக்கின்றன என்பதை அறியமுடியும். மிகவும் ஆவலாக இருக்கிறது.