• மின்தாள்களும் தாள்திரைகī

    by  • September 25, 2003 • அறிவியல்/நுட்பம் • 0 Comments

    இன்றைக்கு Nature என்ற முன்னனி அறிவியல் சஞ்சிகையில் வெளியாகியிருக்கும் ஒரு ஆய்வுக் கட்டுரை என்னைக் கவர்ந்திழுத்தது. சாதாரண காகிதத் தாளை ஒத்த அமைப்பில் கணினி (மற்றும் பிற மின்சாதனங்களுக்கான) விழியத் திரை இப்பொழுது சாத்தியமாகியிருக்கிறது. நெதர்லாந்து நாட்டின் பிலிப்ஸ் (ஆமா, நம்ப ஊர்ல ரெண்டு பாண்ட் டிரான்சிஸ்டர் விப்பாங்களே, அவுகதான்) ஆராய்சிக்கூடத்தில் கண்டுபிடிக்கப்பட இது ஒரு சராசரி தாளைப் போலத்தான் இருக்கும், ஆனால் இதில் சலனப்படங்களைப் பார்க்க முடியும்.

    சில மாதங்களுக்கு முன் அமெரிக்காவின் இ-இங்க் என்னும் நிறுவனம், மின்துளைபரவல் (electrophoresis) என்னும் கருத்தின் அடிப்படையிலான மின்தாள்களைத் தயாரிப்பதைப் பற்றி அறிவித்தது. இம்முறையில் நேர் மற்றும் எதிர் மின்தூண்டலுக்கு உள்ளாகும் நுண்துகள்கள் தாளின் (பாலிமர் பரப்பு) மேற்பரப்பை நோக்கி இழுக்கப்பட்ட, பரப்புக்கு அருகில் வரும் கருப்புத் துகள்களினால் தாளில் எழுத்துக்கள் உருவாகிறது. எழுத்துக்களின் அமைப்பை கணினித் திரைகளை இயக்கும் விடியோ இயக்கி (video driver) மூலம் இயக்க, தாளில் மாறுபடும் எழுத்துக்களை அச்சிடமுடியும் என்று நிரூபித்தார்கள். இம்முறையைப் பயன்படுத்தினால், ஒரு முழுப் புத்தகத்தை (கம்பராமாயணம் முழுக்க) ஒரு தாளிலேயே அடக்கிவிட முடியும்.

    ஆனால் இம்முறையைக் கொண்டு அதிவேக மாறுபாடுகளைக் கொண்ட சலனப்படங்களைக் காட்டமுடியாது. இதற்கு முக்கிய காரணம், மின்துளைபரவல் மிகவும் மெதுவான செயல் (கிட்டத்தட்ட மில்லிநொடிகள் தேவை). இன்றைக்கு பிலிப்ஸ் வெளியிட்டிருக்கும் ஆய்வு முடிவின்படி வண்ணத்தில் சலனப்படங்களைத் தாளில் காட்டுவது சாத்தியமாகியிருக்கிறது. இது அடிப்படையில் மின்ஈரமாக்கல் (electrowetting) என்னும் கருத்துப்படி அமைந்தது. இம்முறையில் துகள்கள் (தின்மப்பொருள்கள்) கிடையாது. இது எண்ணைய் போன்ற திரவத் திட்டில் நிறங்களைக் கொண்ட பல்வேறு சாயங்கள் (dyes) நகர்ந்து பரப்புக்கு வருவதால் சாத்தியமாகிறது. தின்மத் துகள்களைக் காட்டிலும், திரவங்களை மிக எளிதில் நகர்த்தலாம். மேலும் இத்தகைய இயக்கம் மின்துளைபரவலைவிட வேகமாக நிகழ்கிறது.

    பிலிப்ஸ் விஞ்ஞானிகள் இம்முறையைப் பயன்படுத்தி மூவண்ணத் திரை (தாள்திரை) இயக்கிக்காட்டியிருக்கிறார்கள். நெருக்கமாக அமைக்கப்பட்ட துணைபடக்கலம் (subpixel) மூன்றில் அடிப்படை நிறங்கள் மூன்றையும் மின்ஈரமாதல் முறையில், வெவ்வேறு விகிதங்களில் தாளின் மேற்பரப்புக்குக் கொண்டுவர நெருங்கிய இவை கலவையாகி நம் கண்ணுக்குப் பல வண்ணங்களையும் காட்டுகின்றன. (இதே முறையில்தான் தற்பொழுது மடிக்கணினிகளில் திரவப்படிகங்கள் (liquid crystal, LCD) அமைக்கப்பட்டுவருகின்றன. ஆனால் மூன்று வேறு துணைபடக்கலங்கள் இருப்பதால் நேர் குத்தாகப் பார்க்காமல் கண்களைச் சாய்த்துப் பார்க்கும்பொழுது இடமாற்றுத் தோற்றப்பிழை (parallax error) ஏற்படுகிறது. புதிய கண்டுபிடிப்பில் சாயங்கள் எல்லா கோணங்களிலும் பிரகாசமாக இருப்பதால் இந்தப் பிழை தவிர்க்கப்படுகிறது).

    இது அடிப்படை ஆராய்ச்சி முடிவுதான், இதிலிருந்து தொழில்நுட்பமாக வடிவெடுத்துக் கருவியாக பரிணமிக்க நிறைய நாட்கள் ஆகலாம். ஆனால், ஆய்வக நிலையிலேயே இது நடைமுறைத் தொழில்நுட்பத்தைவிட மேம்பட்டதாக நிகழ்த்திக் காட்டப்பட்டிருப்பது விரைவில் சந்தைக்கு வரலாம் என்ற நம்பிக்கையைத் தருகிறது.

    வந்த உடன் ஒன்று வாங்க வேண்டும். கழிவறை, படுக்கை, சாப்பாட்டு மேசை, மார்க்கெட்டிங் சந்திப்புகள், காலை இரயில் பயணம் என்று தினசரிக்கு ஒன்றுக்கு மேல் தேவைப்படும் என்றுதான் தோன்றுகிறது.

    Hayes, R. A. & Feenstra, B. J. Video-speed electronic paper based on electrowetting. Nature, 425, 383 – 385, doi:10.1038/nature01988 (2003). Article

    0 Responses to மின்தாள்களும் தாள்திரைகī

    1. pari
      September 28, 2003 at 12:17 am

      வெங்கட்,

      இரண்டு நாட்களுக்கு முன் பேஜர் செய்தியில், அமெரிக்க ராணுவத்துக்கு பயன்படும் வகையில் இலகுவான திரைகள் (flexible/foldable screens, சரியான பதம் தெரியவில்லை) செய்யும் ஆராய்ச்சியை ·à®ªà¯€à®©à®¿à®•à¯à®¸à¯ பல்கலை கழகத்துக்கு அமெரிக்க அரசு வழங்கியிருப்பதாக செய்தி வந்தது. அதற்கும் இதற்கும் சம்பந்தம் உண்டோ?

      -பரி

    2. venkat
      September 28, 2003 at 12:20 am

      பரி,

      நெகிழ்திரைகள் (flexible displays) என்பவை வேறு விதமான தொழில்நுட்பத்தின் அடிப்படையில் அமைந்தவை. இவை கரிம திரவப்படிகங்களால் (organic Liquid Crystals – OLCD)

      அமைந்தவை. அதாவது இப்பொழுது மடிக்கணினித் திரையில் இருப்பதற்கும் இதற்கும் ரொம்ப தூரம் இல்லை, சித்தப்பா பையன்தான். ஒரே வித்தியாசம், இவை தடிமனில் குறைந்தவை, சுருட்டக்கூடியவை (ஒரு நாளைக்கு டொராண்டோ இரயிலில் காலைக் கூட்டத்தில் பயணிக்கும் பொழுது சட்டைப் பையிலிருந்து பேனாவை எடுத்து, பக்கவாட்டில் விரித்து அன்றைய செய்தித்தாளைப் படிப்பேன் என்ற நம்பிக்கை இருக்கிறது), பிரகாசமும் அதிகம்.

      ஆனால் சில குறைபாடுகள் இருக்கின்றன். இவற்றை ஒரு அளவிற்கு மேல் பெரிதாகத் தயாரிக்க முடியவில்லை. கிட்டத்தட்ட கைக்கணினித் திரைகள்தான் இப்பொழுது சாத்தியம். பிலிப்ஸ் தொழில்நுட்பம் சற்றே உயர்ந்தது. இதை பெரிய (எட்டு தினத்தந்தி) அளவில் தயாரிக்கலாம். எனவே, பில்போர்ட் காரர்களுக்கு சந்தோஷம்.

      அமெரிக்க இராணுவம் – ஹி, ஹி… அவர்கள் இன்னும் பழைய காலத்தில். சொன்னால் நம்பமாட்டீர்கள் எ·à®ªà¯15 விமானங்களில் இருக்கும் விழியங்கள் நம்ப ட்யூப்லைட் கொண்டு இயக்கப்படுபவை. சில மாதங்களுக்கு முன் ஒரு வேலைக்காக இவற்றில் ஒன்றை (கூடவே, தற்பொழுது முன்னனித் தொழில்நுட்பமான NEC மடிக்கணினித் திரையையும்) உடைத்துத் திறந்து பார்த்ததில்… சிரிப்புத்தான் வருகுதைய்யா!!

      பல்வேறு தொழில்நுட்பங்களில் ஆசியர்களிடம் (இப்படிச் சொல்லி நம்மையும் சேர்த்துக்கொள்ளலாம்) அமெரிக்கர்கள் முற்றாகத் தோற்றுவிட்டார்கள். இவற்றில் எலெக்ட்ரானிக் சமாச்சாரங்கள் அதிகம். குறிப்பாக திரைகள். LCD, Plasma, HDTV இவற்றைக் கடைக்குப் போய் ஒரு நோட்டம் விட்டுப் பாருங்கள். அதிகம் இருப்பவை Sharp, Sony, Hitachi, GoldStar, Samsung, இப்பொழுதுதான் RCA போன்றவர்கள் விளையாட்டில் ஒரு ஓரத்திற்கு வந்திருக்கிறார்கள் (அதுவும் இரவல் தொழில்நுட்பத்துடன்). பிலிப்ஸ் ஓரளவிற்குத் தேறி வருகிறது.

      அமெரிக்க நிறுவனங்கள்… கடைசியாகக் கிடைத்த தகவலின் படி HDTVல் வரும் திரைப்படங்களை, DVDல் சேமிப்பதை எப்படித் தடுக்கலாம் என்று தங்கள் விஞ்ஞானிகளைச் சங்கேதங்கள் (encryption) கண்டுபிடிக்கச் சொல்லியும். அந்த சங்கேதங்களைத் தகர்த்து வருங்காலத்தில் டிஸ்னியின் கார்ட்டூன்களைக் காப்பியடிக்கப்போகும் ஐந்து வயதுச் சிறுவனை எந்தச் சட்டத்தில் நீதிமன்றத்திற்கு இழுக்கலாம் என்று கண்டுபிடிக்கச் சொல்லி தங்கள் வழக்கறிஞர்களையும் வற்புறுத்துவதாகத் தெரிகிறது.

    3. -/.
      September 29, 2003 at 12:17 pm

      வெங்கட், எளிதான தமிழிலே இன்னொரு நல்ல அறிவியற்குறிப்பு.

      flexible/foldable screens

      “வளைதகு/மடிதகு திரைகள்” எனலாமோ?

      polymer: ‘பல்பகுதியம்’ என்பது பயன்படுகின்றது (“பாலிமர் பரப்பு” இவ்விடத்திலே நுட்பம் சார்ந்து சொல் வேறுபடலாம் என்பதை ஒத்துக்கொள்கிறேன்)

      error இற்கு வழு என்பதையே பயன்படுத்தலாம் அல்லவா? பிழை என்பது திட்டமிடப்பட்டு உருவானதென்றதாகிவிடும்போலத் தெரிகின்றது. [இடமாறு தோற்றவழு]

      video driver: விழிய இயக்கி பொருந்துமே

      driver: செலுத்தி என்பது இயக்கி என்பதிலும் பொருந்துமா?

      [remote controller இற்கும் ஏற்கனவே இயக்குதல் என்பதோடு தொடர்பு படுத்திச் சொற்களிருப்பதால்]

    4. venkat
      October 1, 2003 at 4:48 pm

      செ.

      தாமதமான பதிலுக்கு மன்னிக்கவும். உங்கள் கருத்துகளை யுனிக்கோடுக்கு மாற்றியிருக்கிறேன்.

      அவசரத்தில் எழுதியது கட்டுரை இது. வளைத்தல் என்பது bending என்பதைக் குறிக்கிறதல்லவா? flexible என்பதற்கு நெகிழ்(தகு) என்பதில் தவறு இருப்பதாகத் தெரியவில்லை. தகு என்னும் பின்னொட்டை சுருக்கம் கருதித் தவிர்த்து, நெகிழ்திரை என்று எழுதினேன். (சௌகார் ஜானகி சினிமா இல்லை:)

      பாலிமர் – குழப்பமாகவே இருக்கிறது. தமிழ்நாட்டில் என்ன படித்தோம் என்பது நினைவில் இல்லை. error என்பதற்கு வழு தான் சரி. அதேபோல்தான் driver – செலுத்தி என்பதுதான் சரி. சுட்டியமைக்கு நன்றி.

      சிலகாலம் தமிழ்ப்பதங்கள் பற்றிய சர்ச்சைகளிலிருந்து முற்றாக ஒதுங்க வேண்டியிருந்தது. காரணம், இணையத்தில் இருக்கும் தமிழ்த் தீவிரவாதிகள். பாலிமரா? பாரதி அன்றே சொன்னானே என்று தொடங்கி உணர்ச்சி வசப்படுகிறார்கள். அந்த விளையாட்டை விளையாட என்னிடம் திராணியில்லை.:)

    Leave a Reply

    Your email address will not be published. Required fields are marked *